Vennikkulam Gopalakkurupp വെണ്ണിക്കുളം ഗോപാലക്കുറുപ്പ്
This Malayalam Poem Manikyaveena Written by Vennikkulam Gopalakkurupp
വന്ദനം വന്ദനം !വാർമെത്തും ദ്രാവിഡ-
നന്ദിനിയായി വളർന്ന ഭാഷേ,
വന്ദനം വന്ദനം !ചിത്തം കവർന്നിടും
ചന്ദനാമോദം കലർന്ന ഭാഷേ,
ജീവന്നു നൂതനോന്മേഷം പകർന്നീടും
ദേവഭാഷാമൃതം ചേർന്ന ഭാഷേ,
നിന്മുലപ്പാലിന്റെ വീര്യമുൾകൊണ്ടതെൻ
ജന്മജന്മാന്തരപുണ്യമല്ലേ.
വശ്യമാം ശൈലിയിൽ നിന്നെജ്ജയിപ്പൊരു-
വിശ്വമനോഹരഭാഷയുണ്ടോ.
താളമിട്ടാടുന്നു തെങ്കടൽകല്ലോല-
പാളി നിൻ ഗാനങ്ങൾ കേട്ടിടുമ്പോൾ;
താനമായ്ത്ത്തീരുന്നു നാളികേരദ്രുമ –
താലപത്രാന്തരമർമ്മരങ്ങൾ;
ആനന്ദരാഗങ്ങൾ മൂളുന്നു നീളുന്ന
കാനനപ്പൊൽക്കുളിർചോലയെല്ലാം.
ത്വൽ കർമ്മമണ്ഡലം വിസ്തൃതമല്ലൊരു
കൈക്കുടവട്ടമാ,ണായിരിക്കാം;
എങ്കിലും നിൻ കീർത്തിയെത്താത്തതെങ്ങുവാൻ?
ശങ്കരദേശികദേശഭാഷേ!
അന്തരീക്ഷത്തിൽ സുഗന്ധം പരക്കുവാ-
നെന്തിനു കസ്തൂരിയേറെയോർത്താൽ?
ചിത്രവർണോജ്വലേ, നിൻ പുഷ്പവാടിയി-
ലെത്ര വസന്തങ്ങൾ വന്നതില്ല?
ഹൃത്തിലൊതുങ്ങാത്തൊരാവേശമാർന്നുകൊ-
ണ്ടെത്ര കുയിലുകൾ കൂകിയില്ല ?
മട്ടോലും പൂക്കളെച്ചുറ്റിപ്പറന്നെത്ര
മത്തഭ്റംഗങ്ങൾ മുരണ്ടതില്ല?
അമ്മമധുമാസവിഭൂതികളൊക്കെയും
രമൃതചേർത്തതിലെത്ര നിന്നിൽ ?
ആവർത്തിച്ചീടട്ടെ പിന്നെയും പിന്നെയു-
മായിരം വട്ടമിശ്രീവികാസം.
കാണുന്നു കല്യാണനിക്ഷേപമെന്നപോൽ –
കാമസുരഭിപോൽ നിന്നെ ഞങ്ങൾ.
നിന്നെഭ്ജിക്കുന്ന ഭാവന ധന്യമാം
നിന്നെപ്പുകഴ്ത്തുന്ന നാവു വന്ദ്യം.
കേരളത്തുമൊഴിയെന്നു കേട്ടാൽ മതി,
കോരിത്തരിപ്പിന്റെ കൊയ്ത്തുകാലം.
ഓജസ്സിൻ കാതലേ, നിന്നെയോര്ക്കുമ്പൊഴേ-
ക്കോരോ ഹൃദയവുമോടിയോടം.
കാണിക്കവെച്ചിടാം സർവവും ശോഭനേ,
മാണിക്യവീണ നീ മീട്ടിയാലും!
English Summary : This Malayalam Poem Manikyaveena Written by Vennikkulam Gopalakkurupp. Vennikkulam Gopala Kurup, a Malayalam poet, playwright, translator, lexicographer, and storey writer, was an Indian poet, dramatist, translator, lexicographer, and story writer.
