Malayalam Poem Vyshnavam Written by Vishnunaarayanan Namboothiri

അവശൻ  കക്കാടിന്റെ 
ദീനശയ്യയിലന്നാൾ  
അവിടന്നിരിക്കെ ഞാൻ 
അർഥിച്ചേൻ: "പേരക്കുട്ടി 
ഇവൾ " ഈശ്വരസത്യ -
ജ്ഞാനി സൂഫിയാം താങ്കൾ 
ഇവളെ നിറുകയിൽ 
തൊട്ടനുഗ്രഹിച്ചാലും!"
കുഴിയാനയി,ലാടിൽ,
അണ്ഡകോടിയിൽ സ്നേഹ -
പ്പൊരുൾ തേടിന  കൈയ്യാൽ 
താങ്കളെൻ   കിടാവിനെ 
എടുത്തു  മടിയിൽച്ചേർ-
ത്തിരുത്തി വികൃതിക-
ളുരച്ചും കളിചിരി -
യുതിർത്തും രണ്ടാം ബാല്യം 
ഇമ്പമായ് നുണച്ചിരി -
ക്കുമ്പോൾ ഞാൻ ചൊന്നേൻ  "പൈതൽ 
മുണ്ടിൻമേലഴുക്കാകാം,
കരുതിയിരിക്കുക ."

ഉറക്കെച്ചിരിച്ചുകൊ -
ണ്ടങ്ങതൻ  മറുപടി ;
"മിടുക്കത്തിയെൻ മെയ്യിൽ 
തളിച്ചോളട്ടെ തീർത്ഥം!

ഒന്നോടൊന്നു ചേരുമ്പോൾ 
രണ്ടാകുമെന്നേ ഞായം,
ഹിന്ദുവും മുസൽമാനും 
ആചരിപ്പതീ ദ്വൈതം.

ഉണ്മയുണ്മയിൽ ചേർന്നാൽ 
ഇമ്മിണി വലുതായി-
ട്ടൊന്നുളവാകും; താങ്ക-
ളോരുമീയദ്വൈതത്താൽ 
പുഴയും പുഴയും ചേർ -
ന്നാനന്ദക്കടലാകും 
കലയങ്ങത്ൻ കണ്ണിൽ 
നർമ്മമായ്  തിളങ്ങുന്നു.

English Summary : This Malayalam Poem Vyshnavam Written by Vishnunaarayanan Namboothiri. Vishnunarayanan Namboothiri was a Malayalam literature scholar and writer from India. Namboothiri is well known for his poetry, although he also contributed to other genres like essays, translations, and children's literature.