Athe Prarthana-Edasseri-അതേ പ്രാർത്ഥന-ഇടശ്ശേരി

Malayalam Poem Athe Prarthana Written by Edasseri.

വസന്തത്തോടർത്ഥിച്ചതു വെറുതെയായില്ല,തേന്മ -
വടിമുടി പൂങ്കുലകളണിഞ്ഞു നിന്നു.
ഒരു പൂവും കൊഴിയാതെയുണ്ണികൾ വിരിഞ്ഞു ,പിന്നീ 
ടൊരുണ്ണിയും പിഴയ്ക്കാതെ വളർന്നു വന്നു.
സമൃദ്ധി മുറ്റിടുംതോറും കുനിയുകെന്നറിവുറ്റാ -
രനധ്യായം പഠിപ്പിച്ചതിനെച്ചൂണ്ടി.
വേനൽ ചുഴന്നുതീയൂതിയതിൻ  നിക്ഷേപമോരോന്നും 
മാണിക്യരത്‌നങ്ങളാകാൻ മുതിർന്നേയുള്ളൂ 
ആയിരമണ്ണാറക്കണ്ണന്മാർ പാഞ്ഞുകേറീ കൊമ്പുകളി -
ലായിരം കാക്കകളതിൽ  പറന്നു വീണു.
ആയിരം കൊച്ചടികളത്തണൽ  വിരിയിൽപ്പതിഞ്ഞു 
മായികനഗരം പോലത്തോപ്പു ചമഞ്ഞു.
അയൽപ്പാതവക്കത്തന്നു വഴിപ്പണിക്കുടച്ചിട്ടോ -
രുരുളൻകല്ലുകൾക്കൊക്കെച്ചിറകും വന്നു 

എല്ലാമെല്ലാം കഴിഞ്ഞപ്പോളമ്മാമരം  കലുഷമാം 
സ്വർലോകത്തിൻ നടയിങ്കൽക്കരഞ്ഞു നിന്നു 
പിന്നത്തെ വസന്തത്തോടുമർഥിക്കയായ്, "ഭഗവാനേ 
തന്നരുൾകെനിക്കു വീണ്ടും സഫലജന്മം."
വേറെന്തുള്ളു വരമെങ്കൽ, ദേവനാക്രോശിച്ചു, "സാധോ 
വേദനയ്ക്കു  വേണ്ടിത്താനോ ചോദിപ്പൂ വീണ്ടും!"
പരിസ്ഫുരൽപ്രഭാതാംശു പതിയും പല്ലവം മെല്ലെ -
ച്ചലിക്കുമാറമാകന്ദം മൊഴിഞ്ഞിതേവം;
"സമ്രദ്ധിതൻ കണ്ണീരെത്ര പുളിച്ചാലും വരം; അയ്യോ ,
ദരിദ്രന്റെ മരവിപ്പാണസ്സഹനീയം!"         

English Summary : This Malayalam Poem Athe Prarthana Written by Edasseri.Edasseri Govindan Nair was an Indian poet and playwright of Malayalam literature. Known as one of the major poets of Malayalam, Edasseri was a recipient of the Sahitya Akademi Award and the Kerala Sahitya Akademi Award for Poetry.