Kaalakal-P.Bhaskkaran-കാളകൾ -പി .ഭാസ്‌ക്കരൻ

Spread the love

Malayalam Poem Kaalakal Written by P.Bhaskkaran

തോളത്തു ഘനം തൂങ്ങും വണ്ടിതൻ തണ്ടും പേറി –

ക്കാളകൾ മന്ദം മന്ദമിഴഞ്ഞു നീങ്ങീടുമ്പോൾ

മറ്റൊരു വണ്ടിക്കാള മാനുഷാകാരം  പൂണ്ടി –

ട്ടറ്റത്തു വണ്ടിക്കയ്യിലിരിപ്പു  കൂനിക്കൂടി.

തോളുകൾ കുനിഞ്ഞിട്ടുണ്ടാവന്നും, സ്വജീവിത –

നാളുകൾ തൽകണ്ഠത്തിലേറ്റിയ നുകം പേറി,

കാലുകൾ തേഞ്ഞിട്ടുണ്ടിന്നവന്നും  നെടുനാള-

ക്കാലത്തിൻ  കരളമാം പാതകൾ താണ്ടിതാണ്ടി.

ദുർവിധി കുടിച്ചെന്നും മിഴിനീർ വറ്റിക്കയാൽ

നിർവികാരങ്ങളാണാക്കണ്ണുകൾ നിര്ജീവങ്ങൾ.

മന്നിന്റെ നിലയ്ക്കാത്ത പ്രഹരം സഹിക്കയാൽ

പുണ്ണുകൾ പടർന്നിട്ടുണ്ടാവന്നും  കരൾക്കാമ്പിൽ.

ഒട്ടേറെക്കാലം മുമ്പിലച്ചെറുപഞ്ഞക്കുടിൽ –

ത്തൊട്ടിലിൽ കൈക്കുഞ്ഞായിപ്പിറന്ന കാലം മുതൽ,

ലക്ഷ്യമെങ്ങറിയാതെ മൃത്യുവിൻ ഭയാനക –

ശിക്ഷയിൽബ്ഭയം പൂണ്ടു കാൽക്ഷണം പതറാതെ,

ജീവിതം കയറ്റിയോരുലക്കടഭാരം തിങ്ങു –

മാവണ്ടി വലിക്കയാണിസ്സാധു നാളിൽ നാളിൽ !

ഗ്രാമവീഥിയിൽ,നേരം വെളുക്കെ,ക്കുടം പേറി,

ത്താമരക്കുളം നോക്കിക്കന്യമാർ ഗമിക്കുമ്പോൾ,

പുഞ്ചയ്ക്കു വെള്ളം തേവും കൃഷിക്കാർതൻ ശുദ്ധമാം

നെഞ്ചുകൾ സംഗീതമായ് ചുറ്റിലും ചുറ്റിടുമ്പോൾ,

ഉച്ചയ്ക്ക് വഴിവക്കിൽപ്പേരാലിൻ  ചുവട്ടിലായ്

സ്വച്ഛനിദ്രയിൽ മുങ്ങിപ്പഥികർ  ശയിക്കുമ്പോൾ,

ചാഞ്ഞിടും കരിക്കൊള്ളിവള്ളിയിലൂഞ്ഞാലാടി –

ക്കാഞ്ഞിരമരത്തോപ്പിൽ  തത്തകൾ ചിലയ്ക്കുമ്പോൾ,  

അന്തിയിൽ, വിഷക്കാവിൽ, വെളിച്ചമകറ്റുവാൻ

ദുർമന്ത്രവാദം ചെയ്യും മൂങ്ങകൾ മൂളീടുമ്പോൾ,

അകലെക്കുന്നിൻമോളിൽ, രാത്രിതൻ ഗുഹകളെ –

യലറും തെണ്ടിപ്പട്ടിയോളിയാൽ നിറയ്ക്കുമ്പോൾ

കണ്ടിടാറുണ്ടു ഞാനാക്കിഴവൻ വണ്ടിക്കാരൻ

വണ്ടിയും തെളിച്ചുകൊണ്ടങ്ങിങ്ങു  ചാരിപ്പതായ്.

മിണ്ടുകില്ലൊന്നും തന്നെ മിഴിയും ചുണ്ടും ;വണ്ടി –

ത്തണ്ടിന്റെ  ദയാർഹമാം ഞരക്കം മാത്രം കേൾക്കാം.

കാളകൾ ചരിക്കുന്നു മന്ദമായ്;ത്തെളിക്കുന്ന

കാള’യും  ചലിക്കുന്നിതാവിധമൊന്നും തന്നെ !

ഒട്ടേറെയപൂർവമായ്ക്ക്കേട്ടിടാം, വണ്ടിക്കാരൻ –

ചാട്ടവാറുലയ്ക്കവേ മൂളുന്ന പാട്ടൊന്നേവം:

“നാടകമേ…യുലകം;നാളൈ, നടപ്പതേ –

യാരറിവാർ -ഒരു നാടകമേ…..യുലകം!”

ഒരു നാൾ ഗ്രാമവീഥി തന്നിലായ്കണ്ടു ഞാനെൻ

കരളു നടുങ്ങാവെയിമ്മട്ടാമൊരു  രംഗം;

നാലുപേർ-അല്ലാ-നാലുകാളകൾ-പഴന്തുണി

മൂടിയ മരക്കട്ടിൽ  പേറി മുന്നേറിടുന്നു!

കട്ടിലിൽ -തതുണിക്കുള്ളിൽക്കിടപ്പൂ തൻ ചൈതന്യം

വറ്റിയ ‘വണ്ടിക്കാള ‘ -പണ്ടത്തെ വണ്ടിക്കാരൻ!

കണ്ണുനീർ ചൊരിഞ്ഞീലാ  ചുറ്റിലും മിത്രാദികൾ;

വിണ്ണിലായ് വിഷാദത്തിൻ വിലാപം പടർന്നീല.

തോളത്തു ഖനം തൂങ്ങും കട്ടിലും പേറിക്കൊണ്ടു

കാളകൾ നാലും മാത്രമിഴഞ്ഞു മുന്നേറുന്നു.  

English Summary : This Malayalam Poem Kaalakal Written by P.Bhaskkaran.Pulloottupadathu Bhaskaran alias as P. Bhaskaran, was a Malayalam poet, lyricist of Malayalam film songs and filmmaker. He penned more than 3000 songs for about 250 films. He also directed 44 Malayalam feature films and 3 documentaries, produced 6 feature films and acted in several movies.